A propos de Beijing...

Gen pitye pou fanm

Sispann kritike fanm

Paske se yo ki ba nou nanm

Se yo ki ba nou manje

Se yo ki souye dlo nan ie

Sispann ba yo baton

Paske se yo ki netwaye koton

Sispann pran fanm fè jwèt

Sispann fè yo fè vye piwèt

Sispann bay fanm kout bòt

Sispann di fanm sòt

Paske se yo ki travay plen midi

Pou yo ka geri n anba maladi

Se yo ki gen bonte

Se yo ki leve avan kòk chante

Pou y al chèche bannann mi

Pou yo ka nouri la fanmi

Sispann bat fanm ak ne banbou

Paske yo redi twòp nan tout vye labou

Pou n pa grangou

Kit lòt bò dlo kit ann Ayiti

Fanm se pa yon bagay ki piti

Epoutan nou wè y ap pase mizè nan lari

Pou n mande sekou fò n rele manman

Mari

Paske se fanm ki ponn ze lanmou

Se fanm ki fè tout bagay di vin mou

Renmen fanm se renmen Bondye

Renmen fanm se gen pitye

Sispann bwè kleren

Pou n pa bat fanm nan ren

Pitye pou fanm, pitye pou fanm

Sispann bay fanm jouman

Si pa gen fanm pa gen manman.

Boursiquot Godfroy

15/9/95 - Micivih-Zen